دكتورة هدي المراغي... دكتور وجيه المراغي دكتورة هدى اخدت اسم جوزها "المراغي" والمراغي ده يبقى شيخ الازهر الشريف زمان جد وجيه المراغي جوزها
هي بقى من عيلة مين اصلا؟؟!
من عيلة "الجمّال" اللي منها "رفعت علي سليمان الجمال" ايون... اللي هو حضرتك بتتفرج على حلقات المسلسل كل ما تتعاد تحت مسمى"رأفت الهجان" وهو حفيد شيخ الازهر لزم...
يعني من الاخر كده عيلتين واضح اصلهم وفصلهم...
الاتنين درسوا هندسة... وخلصوا وطلعوا يكملوا دراستهم في كندا علشان يستفيدوا ويرجعوا يفيدوا بلدهم...
وجيه المراغي راح اخد ماجستير بتاعه في تصميم القطار السريع الكندي وفعلا تم استخدام كل دراساته تم تنفيذ القطار... عقبال قطار الصعيد كدة يا رب
الدكتوراه بتاعته بقى كانت القطار اللي بدورين وما شاء الله... لحد النهاردة قطارات الدكتور وجيه بتجري في كل مكان في كندا زالفل الحمدلله... زالفل
الدكتورة هدي هانم بقى راحت عملت الدكتوراه بتاعتها هي كمان في كندا برضه...
وبعدين رجعوا مصر بقى .... آن آن آآآآآآآآآآآآآآن
الاثنين رجعوا مصر....
قابلهم الدكتور شحيبر ابو فازلين اللي في الجامعة عندنا وقالهم لا لا لا... دكتوراه ايه ونسناس ايه؟؟ لازم تنزلوا درجة علمية عشان سافرتم وسبتوا البلد... وعشان تبقوا من مستوانا العلمي
طبعا هما حاولوا يفهموا دكتور شحيبر انهم راحوا يتعلموا وراجعين بعلم يفيد مصر... انما الفازلين كان مليّس على راسه مبهدله.... فراح طاصصهم الجملة الأشهر في تاريخ البيروقراطية المصرية
"اللايحة لا تسمح"
دكتور وجيه كان حيقوله ياللا يا ابن اللايحة بس قصر الشر... ولم هدومه هو مراته... وطلعوا على كندا تاني..
حط راسه في الشغل والابحاث بقى لحد ما تم اختياره واحد من أهم ١٠ اساتذة هندسة صناعية في العالم... ايوة يعني صنعته ايه عدم اللامؤاخذة برضو؟؟؟
لا ابدا... بيصمم مصانع...مصانع بلح زي اللي عندنا دي هنا؟؟
لا... كندا مافيهاش بلح... انما فيها شركة زي كرايسلر بتاعة العربيات مثلا... الشركة دي بتستشيره في تطوير مصانعها... ولما بيكون عندهم مشكلة بيكلموه...
طب والدكتورة هدى؟؟؟ قعدت تربي العيال؟؟؟ وتفرغت لعمايل المحشي؟؟؟
لا... كندا مفيهاش محشي برضك...
الدكتورة هدى بقت "اول سيدة في تاريخ كندا عميد لكلية الهندسة"... اه وربنا زي ما بقولك كدة...
بقوا "بيدرّسوها" هي شخصيا... في منهج المدارس هناك كواحدة من أهم النساء في تاريخ كندا...
طب والمحشي؟؟!!!
بقت أول إمرأة مستشار لوزير الدفاع الكندي... احيه... والمحشي؟؟!
بقت بتدي استشارات لشركة فورد بتاعة العربيات...
واضح ان المحشي مالوش عيش في كندا
الصور اللطيفة دي من ايام قليلة... دي في زيارتهم للاقصر مع اولادهم واحفادهم ... هما كانوا ممكن يسافروا اي مكان تاني يتفسحوا على فكرة... اظن مش محتاجة مناقشة... افضل اماكن في الكوكب تتمنى يزوروها...
انما بعد اللي حصلهم من مصر... برضو اختاروا مصر عشان يقضوا فيها "اجمل اوقاتهم" زي ما قالوا...
زارو مستشفى سرطان الاقصر اللي بتتبني... قرروا يساعدوا ويساهموا كمان فيها...
دي عينة المصريين اللي موجودة في مشارق الارض... ومغاربها...
ليست هناك تعليقات: